Gürcüstan prezidenti Salome Zurabişvili parlament seçkilərinin nəticələrinə etiraz edən müxalifətin hərəkətlərindən narazılığını bildirib.
“Heç kim müxalifətdən razı deyil - nə mən, nə də əhali, çünki müxalifət başqa şeyə hazırlaşırdı. Biz nizamnaməyə (müxalifətin seçkilərdə qalib gələcəyi təqdirdə islahat planı – red.) uyğun fəaliyyət planını bilirdik, hansı qanunlar qəbul olunmalı, növbəti seçkilərə necə getməli idik”, - Zurabişvili bildirib.
Prezidentin qeyd etdiyi kimi, siyasi partiyalar küçə etirazlarına yox, seçkilərə hazırlaşırdılar. "Daha çox koordinasiya olmalıdır, bu, insanların tələbidir", - deyib.
QAZÍLER.AZ Lent.az-a istinaden bildirir ki, oktyabrın 26-da Gürcüstanda parlament seçkiləri keçirilib. Hakim “Gürcü Arzusu - Demokratik Gürcüstan Partiyası” 53,93 faiz səslə qalib gələrək qanunverici orqanda 150 yerdən 89-unu qazanıb.
5 faizlik baryeri dörd müxalifət partiyası – “Dəyişiklik üçün Koalisiya”, “Birlik – Milli Hərəkat”, “Güclü Gürcüstan” və “Gürcüstan Naminə Qaxariya” keçib. Parlamentə daxil olan bütün müxalifət partiyaları seçkinin nəticələrini tanımaqdan imtina edib və mandatlarından imtina edəcəklərini bildiriblər. Müxalifət liderləri noyabrın 4-dən təkrar seçkilərin keçirilməsi tələbi ilə etiraz aksiyaları keçirirlər.
Həmçinin, seçkilərdən əvvəl müxalifətin “Gürcü arzusu” üzərində birgə qələbə qazanacağı təqdirdə “Gürcüstan Xartiyası”nın – vahid planının təşəbbüskarı olan ölkə prezidenti Salome Zurabişvili də səsvermənin nəticələrini saxta hesab edir. Bundan əvvəl o, Gürcüstanın Konstitusiya Məhkəməsinə müraciət edərək parlament seçkilərinin Konstitusiyaya zidd elan edilməsini tələb edib.
