Bir çox ukraynalı ümid edir ki, ABŞ seçkilərinin nəticəsi Rusiyanın Ukraynaya qarşı müharibəsinə son qoymağa kömək edəcək. Bəziləri Respublikaçılar Partiyasından prezidentliyə namizəd Donald Trampın Moskvaya daha yumşaq yanaşacağından narahat olsa da, digərləri Demokratlar Partiyasından prezidentliyə namizəd Kamala Harrisin siyasəti altında yardımın – əhəmiyyətli olsa da – yavaş çatdırılacağından narahatdır.
Paytaxt Kyivdə və Ukraynanın başqa yerlərində insanlar ABŞ seçkilərinin nəticələri və bunun müharibədən əziyyət çəkən ölkələrinə necə təsir edəcəyi ilə maraqlanır. Onlar narahatdır.
"Gələcək prezidentin bizi dəstəkləyəcəyinə dair gözləntilərim var. Bizim siyasətimizi də, hərbi fəaliyyətimizi də" - deyə, Kyiv sakini Anhelina bildirim.
Dmitri kimi narahat olan sakinlər də var: "Kimin qalib gələcəyi və ümumilikdə ölkəmizlə bağlı siyasətin necə olacağı maraqlıdır. Məni maraqlandıran budur. Tanrı hər ikisinin bizə dəstək olacağını nəsib etsin".
Ən böyük qorxu ABŞ-ın yeni administrasiyasının dəstəyini dayandırması və Rusiyaya qarşı mübarizədə Ukraynanı tərk etməsidir. Bunu politoloq Mikola Davidyuk deyir.
"Bir vaxtlar demokratik ölkəni avtokratiyaya çevirmək milyonlarla insanın ölümünə səbəb olur. Ölkənin qorxduğu da budur" - deyə, politoloq bildirib.
İki il yarım davam edən müharibədən sonra Ukraynada əhval-ruhiyyəyə təsir edən əsas amil Ağ Evin yeni administrasiyası zamanı nəyin baş verəcəyi ilə bağlı qeyri-müəyyənlikdir.
Tramp müharibəni tez bitirəcəyini vəd edir və bir çoxları qorxur ki, bu o deməkdir ki, o, vəzifəyə qayıdarsa, Ukrayna həddən artıq güzəştə getməyə məcbur olacaq.
Eyni zamanda, ukraynalılar xatırlayırlar ki, Tramp prezident kimi Ukraynaya tammiqyaslı işğalın başlanğıcında Rusiyaya qarşı döyüşməyə kömək edən “Javelin” tank əleyhinə sistemlərin satışını təsdiqləyib.
Obama-Bayden administrasiyası 2014-cü ildə Rusiya Krımı ilhaq edəndə və Ukraynanın şərqindəki Donetsk bölgəsinin böyük hissəsini ələ keçirəndə Ukraynanın bu silahlarla bağlı tələbini rədd etmişdi.
Ancaq ukraynalılar arasında qarışıq hisslər var. Trampın qələbəsindən qorxan Svitlana kimi.
"Tramp çox qəribə adamdır və onun çox qəribə düşüncələri var", Svitlana qeyd edib.
İvan kimi digərləri isə keçmiş təcrübəyə əsaslanaraq əminlik tapırlar.
"Tramp artıq prezident olub, onun üsulları məlumdur və məncə, qorxulu heç nə yoxdur", Dmitro deyib.
Bayden administrasiyası altındakı ABŞ Ukraynaya qarşı səxavətli olub, tammiqyaslı işğalın başlanmasından bəri onu dəstəkləmək üçün 175 milyard dollar xərcləyib. Lakin Ukrayna liderləri arasında məyusluqla yardımın gec çatdığını deyənlər də var.
"Rusiya ordusu indi tərəfdaşlarımızdan, xüsusən də Amerika Birləşmiş Ştatlarından tədarük gözlədiyimiz vəziyyətdən istifadə etməyə çalışır. Məhz buna görə də çatdırılma sürəti cəbhəni sabitləşdirmək deməkdir", Ukrayna prezidenti Volodimir Zelenski bildirib.
Təhlilçilər deyirlər ki, seçilərsə, Kamala Harrisin siyasəti Baydenin siyasətinə bənzər olacaq və davamlılıq perspektivi bəzilərində əminlik yaradır.
Ancaq digərlərini müharibənin uzana biləcəyi narahat edir.
Kyivdəki Razumkov Mərkəzinin keçirdiyi sorğunun nəticələrinə görə, respondentlərin ukraynalıların 44%-i Ukrayna və Rusiyanın tezliklə sülh danışıqlarına başlamalı olduğunu düşünür, lakin sorğuda iştirak edənlərin əksəriyyəti Putinin şərtlərini qəbuledilməz hesab edir.
Ukraynanın Avropadakı əsas tərəfdarları arasında tükənmişliyin artdığı bir vaxt burada bir çoxları ABŞ seçkilərini həmişəkindən daha çox ümid kimi görürlər, hərçənd ki, bundan tam əmin deyillər.
visiontv.az
