1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Türkiyənin Diyarbəkir vilayətində avqustun 21-də yoxa çıxan və 19 gün sonra kənd yaxınlığındakı dərə yatağında çuvalın içində meyiti tapılan 8 yaşlı Narin Güranın istintaqı davam edir.
İstintaq zamanı Narinin qətlində əsas şübhəli olan əmisi Salim Güranın vəkili Seda Toğrul onun müdafiəsinə davam etməyəcəyini və bu işdə onun vəkili olmaqdan imtina etdiyini açıqlayıb.
Bu barədə Oxu.Az Türkiyə KİV-ə istinadən xəbər verir.
Xatırladaq ki, Narinin əmisi və eyni zamanda məhəllə muxtarı olan Salim Güran uşağın qətlində əsas şübhəli olaraq qalır.
"İctimaiyyət tərəfindən yaxından izlənilən Narin Güran hadisəsi hamımızı dərindən kədərləndirib. Hadisə ilə bağlı heç bir konkret dəlil olmadığı, Narinin sağ olub-olmadığı belə məlum olmadığı zamanda şübhəli Salim Güran həbs olunarkən konstitusiyanın verdiyi müdafiə hüququ çərçivəsində onun müdafiəsini öz üzərimə götürmüşdüm. Lakin işin hazırkı mərhələsində müttəhimlərin ifadələrini, Narinin ölü olaraq tapıldığını və digər sübutları da nəzərə alaraq, bir ana kimi Salim Güranın müdafiəsinə davam edə bilməyəcəyəm və bu işdən geri çəkilirəm. Gözəl qızımız Narinin yaşadıqlarının dərin kədərini və ağrısını bir ana olaraq ürəyimdə hiss edirəm. Bundan sonra müdafiəçi kimi yox, bir ana və vətəndaş olaraq bu işi yaxından izləyəcəyəm. Ümid edirəm ki, ədalətli mühakimə həyata keçiriləcək və bütün günahkarlar cinayət məsuliyyətinə cəlb olunacaqlar", - deyə Seda Toğrul bildirib.
Qeyd edək ki, Narin Güranın qətlinin üstü hələ tam olaraq açılmasa da, meyitin dərə yatağında gizlədilməsində Salim Gürana kömək edən və həbs olunan Nevzat Bahtiyar adlı şəxsin ifadəsində işlətdiyi söz diqqət çəkib.
Nevzat Bahtiyar Narinin əmisinin meyiti adyala büküldüyü halda gətirdiyini, sonra adyalı özü ilə apardığını bildirmişdi. Həmin adyalın hansı evə aid olduğu və üzərində aşkarlanacaq DNT nümunələri isə qətlə aydınlıq gətirəcək.
Bahtiyarın sözlərinə görə, Narini çuvalın içinə yerləşdirdikdən sonra adyalı Salim Güranın maşınının ön oturacağına qoyub. O, adyalın bir nəfərlik olduğunu, lakin rənglərini xatırlamadığını bildirib. Hazırda Narinin meyitinin büküldüyü adyalın kimə aid olduğu, hara aparıldığı və hansı evdən çıxdığı ilə bağlı araşdırmalara başlanılıb.
