Bu gün 19 yaşadək futzalçılardan ibarət Azərbaycan millisinin AVRO-2025-in seçmə mərhələsinədəki rəqibləri müəyyənləşəcək.
Fanat.Az xəbər verir ki, püşkatma Bakı vaxtı ilə saat 17:15-də keçiriləcək.
Reytinq cədvəlinin 27-ci sırasında qərarlaşan komandamız bu dəfə mübarizəyə ilkin mərhələdən başlayacaq. Komandalar artıq səbətlərə bölünüb. Millimiz Gürcüstan və Monteneqro ilə bir səbətdə yer alıb. Bu komandalar ayrı-ayrı qruplara düşəcəklər və öz qrupunun birinci komandası olacaqlar. Püşkatmada ölkəmizi futzal üzrə milli komandanın meneceri Fərrux Hüseynzadə təmsil edəcək.
Ümumilikdə AÇ-2025-də 36 komanda yarışacaq. Final mərhələsinə ev sahibliyi edəcək Moldova yarışa ən son mərhələdə qoşulacaq. Reytinq cədvəlində yer alan 35 komandadan 10-u isə ilkin mərhələdə iştirak edəcək. Onlar 3 qrupa bölünəcəklər. A qrupunda 4, B və C qrupunun hər birində 3 komanda yer alacaq. Yalnız qrup birinciləri əsas mərhələyə vəsiqə qazanacaq. İlkin mərhələnin oyunları gələn il yanvarın 21-dən 26-dək keçiriləcək. Bu mərhələdə qrup oyunlarını qəbul etməyə iki federasiya razılıq verib. A və B qrupunun oyunları püşkün nəticəsindən asılı olaraq Litva və San Marinoda təşkil olunacaq. C qrupunun oyunlarını keçirmək istəyən federasiya noyabrın 11-dək UEFA-ya müvafiq müraciət göndərməlidir. Əks halda, UEFA həmin qrupda yer alan ölkələrdən birini seçəcək.
Əsas mərhələdə isə 28 komanda 4 qrupda mübarizə aparaxaq. Bu mərhələnin oyunları 25-30 mart tarixlərində keçiriləcək. Yekunda qrup qalibləri final mərhələsinə yüksələcək.
Final mərhələsinin oyunları gələn il 28 sentyabr – 5 oktyabrda Moldovanın paytaxtı Kişinyovda təşkil olunacaq.
1-ci səbət (ev sahibləri): Litva (qrup mövqeyi-2), San Marino (qrup mövqeyi-3 və ya 4)
2-ci səbət (qrup mövqeyi-4 və ya 3): Malta, Almaniya, Estoniya
3-cü səbət (qrup mövqeyi-2): Kosovo, Cəbəllütariq
4-cü səbət (qrup mövqeyi-1): Gürcüstan, Azərbaycan, Monteneqro
