“Mançester Yunayted”in yeni baş məşqçisi Ruben Amorim “qırmızı şeytanlar”ın futbolçularının müdafiəsi üçün hamıya qarşı dayanmaq əzmindədir.
Arena.az məlumat verir ki, portuqal mütəxəssis, çalışdırdığı futbolçulara qarşı hədsiz və əsassız tənqid təqdirində onları müdafiə etməyə hazır olduğunu vurğulayıb:
“Mən komanda üçün hər şeyi edəcəyəm. Gərək olsa, oyunçularımı qorumaq üçün hamıya qarşı çıxacağam. Bu, mənim üçün əsas məqamdır. Klubun layiq olduğu yerə qayıtması üçün hər şeyi etməyə çalışacağam. Qalib gəlmək üçün hər şeyi edəcəyəm”, deyə Amorim vurğulayıb.
Portuqal mütəxəssis həmçinin hesab edir ki, “qırmızı şeytanlar”ın cari komandası gənc olmasına rəğmən, nəticə əldə etməyə qadirdir:
“Bizim, gənc komanda olduğumuz üçün vaxta ehtiyacımız olduğunu demək istəmirəm. Onlar hazırdırlar. Bu futbolçular “Mançester Yunayted”in qarşısına qoyulan tələblərin öhdəsindən gəlməyə hazırdırlar. Onlar burada olduqları üçün çətinliklərə hazır olmalıdırlar”, deyə Amorim vurğulayıb.
Qeyd edək ki, 11 turdan sonra “Mançester Yunayted” Premyer Liqanın yarış cədvəlində 15 xalla 13-cü pillədə qərarlaşıb.
Noyabrın 11-də Ruben Amorim “qırmızı şeytanlar”ın sükanı arxasında rəsmən fəaliyyətinə başlayıb.
Vurğulayaq ki, Amorim Avropanın ən perspektivli çalışdırıcılarından biri hesab edilir. “Sportinq”də Amorim Portuqaliya nəhəngləri “Benfika” və “Portu”ya divan tutan rəqabətəqadir kollektiv təsis edə bilib. Məhz bu amil “Mançester Yunayted”in Ruben Amorimi “qırmızı şeytanlar”a yeni baş məşqçi seçməsində əsas olub.
Ruben Amorim məşqçiliyə 2018/2019-cu illər mövsümündə “Kaza Piya” klubunda başlayıb. Bundan sonra gənc portuqal mütəxəssis “Braqa”nın “B” komandasını, ardınca isə əsas komandasını çalışdırıb. 2020-ci ilin mart ayında isə Amorim “Sportinq”in sükanı arxasına keçib. Portuqal mütəxəssisin Lissabon klubu ilə müqaviləsi 2026-cı ilin iyun ayının sonuna qədər qüvvə idi.
Amorim rəhbərliyi müddətində “şirlər”ə 2 dəfə Portuqaliya Premyer Liqasını (2020/2021, 2023/2024), 2 dəfə Portuqlaiya Liqa Kuboku (2020/2021, 2021/2022) və Portuqaliya Super Kubokunu (2021/2022) qazandırıb. Həmçinin Amorim “Braqa” ilə Portuqaliya Liqa Kubokunun (2019/2020) qalibi olub.
