Uşaq Səfirlər Məclisi üzvləri BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu Sessiyası (COP29) çərçivəsində keçirilən “Uşaqlar, Gənclər və İqlim Fəaliyyəti” mövzusunda yüksək səviyyəli dəyirmi masada iştirak ediblər. Tədbir COP29 Prezidentliyi, Gənclər və İdman Nazirliyi və Ailə, Qadın və Uşaq Problemləri üzrə Dövlət Komitəsi tərəfindən təşkil olunmuş, UNICEF-in tərəfdaşlığı ilə həyata keçirilib.
QHT.az xəbər verir ki, tədbirdə gənclərin və uşaqların iqlim dəyişiklikləri ilə mübarizədə iştirakı, onların təhsildə, sağlamlıqda və sosial müdafiədə innovativ təşəbbüsləri müzakirə olundu. Eyni zamanda, gənclərin fikir və təkliflərinin beynəlxalq iqlim siyasətindəki rolunun artırılması vacibliyi vurğulandı.
Müzakirələrdə iştirak edən Uşaq Səfirlər Məclisi üzvləri məclisinin fəaliyyəti haqqında məlumat verərək bu il keçiriləcək VI Ümumrespublika Uşaq Forumu çərçivəsində təşkil ediləcək hər bir panelin ekologiya ilə əlaqələndiriləcəyinə diqqət çəkiblər.
