"Schlumberger Overseas S.A." şirkətinin Azərbaycan nümayəndəliyinə inzibati protokol yazılıb.
Pravda.az-ın xəbərinə görə, protokol Dövlət Gömrük Komitəsi tərəfindən İnzibati Xətalar Məcəlləsinin 485.2-ci (Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir) maddəsinə əsasən tərtib edilib.
İş Səbail Rayon Məhkəməsinin hakimi Günel Səmədovanın icraatındadır.
Qeyd: Azərbaycanda 1997-ci ildə dövlət qeydiyyatına alınan şirkətin qanuni təmsilçisi Jodi Leigh Wooddur. “Schlumberger Overseas S.A.” şirkəti Almaniya ilə Fransanın sərhəddindəki Alsace regionunda qeydiyyatdan keçib, şirkətin yaradıcısı Conrad Schlumberger-dir. Bu, dünyanın ən iri neft-servis şirkətlərindən biridir. Azərbaycanda BP-nin başçılıq etdiyi konsorsiuma xidmətlər göstərir.
Xəyal Quliyev
