"Yeni "Oreşnik" raket sistemində raket istisna olmaqla, bütün işəsalma qurğusu Belarusda istehsal olunur".
Oxu.Az-ın BELTA-ya istinadən xəbərinə görə, bu barədə Belarus Prezidenti Aleksandr Lukaşenko danışıb.
Lukaşenko Belarusda "Oreşnik" istehsalının yüksək səviyyədə lokalizasiyasını vurğulayıb.
"Oreşnik"də bütün işəsalma qurğusu Belarusundur. Raketdən başqa. Lokalizasiya ən yüksək səviyyədədir. Mən ona (Rusiya Prezidenti Vladimir Putinə - red.) dedim: "Biz raket məsələsini qaldırmırıq. Lazım gələrsə, birlikdə edəcəyik, bu baxımdan kifayət qədər səriştəmiz var, atom elektrik stansiyasında olduğu kimi, kömək edəcəyik. İşəsalma qurğusunu isə biz istehsal edəcəyik - Minsk Təkərli Traktor Zavodu istehsal edir. Və daha ciddi işlər görür. Ona görə də gəlin, birlikdə hərəkət edək", - deyə Belarus lideri bildirib.
Lukaşenko hesab edir ki, "Oreşnik"in yerləşdirilməsi potensial rəqiblərə çəkindirici təsir göstərəcək.
"Əgər bizim adi belə güclü silahımız olarsa, polyaklar Koreyadan ABŞ-yə qədər aldıqları tanklarla və bəzi digər piyada döyüş maşınları, raketlərlə üzərimizə gəlməzdən əvvəl dərindən düşünəcəklər", - deyə o bildirib.
Həmçinin, Lukaşenko vurğulayıb ki, təcavüzə cavab ciddi olacaq, çünki "Oreşnik"ə qarşı "zərdab" yoxdur, onun qarşısını almaq və ya vurmaq mümkün deyil.
Lukaşenko onu da qeyd edib ki, "Oreşnik" üçün hədəfləri Belarus özü müəyyən edəcək, amma "düyməyə basmaq" lazım gələrsə, ölkə bunu Rusiya ilə birlikdə edəcək.
"Hədəfləri Belarusda biz müəyyənləşdirəcəyik, rusiyalılar deyil. Amma istifadəsində kömək edəcəklər. Yəni Allah eləməsin, lazım gələrsə, düyməyə birlikdə basacağıq", - deyə o bildirib.
Qeyd edək ki, Belarusda artıq yeni raket sisteminin mümkün yerləşdirilməsi üçün 30-a yaxın ərazi müəyyən edilib ki, onlardan hədəflərə qədər olan məsafə minimal olmalıdır.
