"Sülh müqaviləsi" və Ermənistanın eyni zamanda Azərbaycana qarşı silahlanması uzlaşmaz iki kursdur. Bunu Azərbaycan Prezidenti İlham Əliyev bildirib.
"Sülh müqaviləsi üzrə əslində böyük irəliləyiş əldə etmişik. Sənədin 17 maddəsindən 15-i razılaşdırılıb, cəmi 2 maddə qalıb. Mənim Ermənistanın baş naziri ilə Kazanda keçirdiyim son görüş zamanı hiss etdiklərim və eşitdiklərim ondan ibarət idi ki, bu iki maddə hələ razılaşdırılmayıb, lakin Ermənistanın bizim şərtlərimizi qəbul etməsi mümkündür," - Prezident Əliyev vurğulayıb.
Onun sözlərinə görə, bu maddələrdən biri "bir-birinə qarşı beynəlxalq iddialardan çəkinməklə bağlıdır. Çünki bu, qarşılıqlı məqbul maddədir. Biz son vaxtlar dəyən ziyanla bağlı təhlilləri yekunlaşdırmışıq. Bu təhlillər təxminən 4 il vaxt apardı və sənədləşdirildi. İşğal illərində bizə vurulan ziyanın məbləği 150 milyard dollardan çoxdur. Buna görə də qarşılıqlı iddialardan çəkinmək məqbul bir şərt olardı. Digər maddə isə "sərhədimizdə digər ölkələrin nümayəndələrinin yerləşdirilməməsi ilə bağlıdır. Bu bizim üçün niyə vacibdir? Çünki bizimlə Ermənistan arasındakı sərhəddə guya Avropa müşahidəçiləri adı altında NATO infrastrukturu yaradılıb. Bu müşahidəçilərin göndərilməsi məsələsi əvvəlcə bizimlə razılaşdırılmışdı, lakin sonra razılaşmadan kənar genişləndirildi," - Əliyev qeyd edib.
Prezident Əliyev Ermənistanın daha iki addım atmalı olduğunu bildirib.
"Birincisi, öz konstitusiyasını dəyişməkdir. Çünki Ermənistanın konstitusiyasında Azərbaycanın ərazilərinə qarşı iddialar var. İkincisi isə ATƏT-in Minsk Qrupunun ləğv edilməsidir. Bu qrup artıq funksional deyil və əgər Ermənistan Qarabağı Azərbaycanın bir hissəsi kimi tanıyırsa, bu qrup nəyə lazımdır? Ermənistanın Minsk Qrupunun ləğvinə razılıq verməməsi revanşist planların olduğunu göstərir. "Sadaladığım məsələlər həll edilsə, sülh müqaviləsinin imzalanması üçün heç bir maneə qalmayacaq," - Əliyev vurğulayıb.
N.Təbrizli
www.anews.az
