İngiltərədə 50 mindən çox uşaq Yeni ili evsiz keçirəcək

Bakı, TurkicWorld

İngiltərədə yayımlanan yeni məlumatlara görə, ən az 56 min ibtidai məktəb şagirdi yeni ilə evsiz girəcək.

TurkicWorld xəbər verir ki, bu məlumat, Shelter xeyriyyə təşkilatının təhlilinə əsasən açıqlanıb və hökuməti sosial evlərin tikintisini sürətləndirməyə çağırıb.

Təhlilə görə, Londonda hər 24 uşaqdan biri müvəqqəti yaşayış yerlərində qalır. Şərqi Londondakı Newham rayonunda isə bu nisbət daha yüksəkdir, burada hər 9 uşaqdan biri evsizdir.

Birmingemdə isə hər məktəbdə orta hesabla 15 uşaq evsizdir. Ümumilikdə, İngiltərədə 160 min uşaq müvəqqəti yaşayış yerlərində qalır, 123 min 100 ailə isə otel və ya qısa müddətli kirayə mənzillərdə qalmağa məcburdur.

İngiltərə hökuməti, evsizliyi azaltmaq məqsədilə yerli hakimiyyət orqanlarına əlavə 1 milyard funt sterlinq ayıracağını açıqlayıb. Baş nazirin müavini və mənzil naziri Angela Rayner, bu Milad bayramında 160 min uşağın sabit evdə yaşaya bilməməsini qəbuledilməz olaraq qiymətləndirib və bu problemi kökündən həll etmək üçün tədbirlər görüləcəyini vurğulayıb.

Yeni fond, müvəqqəti yaşayış yerlərini təmin etmək və küçələrdə yaşayan insanlara dəstək xidmətlərini artırmaq məqsədini güdür.

Shelter-in baş direktoru Polly Neate, bu rəqəmlərin sosial evlərə olan təcili ehtiyacı göstərdiyini vurğulayıb və hökumətə sosial evlərin tikintisini sürətləndirməyi tövsiyə edib.

Hökumətin əlavə maliyyə ayırması problemi tamamilə həll edib-etməyəcəyi isə zamanla məlum olacaq.