İngiltərə Premyer Liqasının 17-ci turunun “Kristal Pelas”la səfər oyunu “Arsenal”ın mərkəz hücumçusu Qabriel Jezus üçün düşərli olub.
Arena.az məlumat verir ki, braziliyalı futbolçu “topçular”ın 5:1 hesabı ilə qələbə qazandıqları bu oyunda “Arsenal”ın qələbəsinə dübarə qolla töhfəsini verib.
“Squawka” dərgisinin təqdim etdiyi məlumata görə, Jezusun İngiltərə Premyer Liqasında qol vurduğu 61 oyunda “Arsenal” bir dəfə də olsun, məğlub olmayıb. İndi Jezus “Arsenal” azarkeşləri arasında “uğur mələyi” kimi tanınır.
Qabriel Jezus “Palmeyras”ın yetirməsidir. Braziliyalı hücumçunun Avropa karyerası “Mançester Siti”də başlayıb. Qabriel Jezus “Arsenal”a 2022-ci ilin iyulunda 52,20 milyon avro məbləğ müqabilində elə, “şəhərlilər”in düşərgəsindən keçib.
“Qabbi”nin “topçular”la müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümündə Jezus “topçular”ın heyətində bütün yarışlarda 22 oyuna 6 qol, 2 məhsuldar ötürmə ilə fərqlənib.
Jezus “Arsenal”ın heyətində ümumilikdə 91 oyun keçirib, 25 qol və 17 məhsuldar ötürmə ilə yadda qalıb.
Qabriel Jezus 2016-cı ilin sentyabrında debüt etdiyi Braziliya millisinin heyətində 64 oyuna 19 qol vurub, 13 məhsuldar ötürmə verib.
“Transfermarkt” internet-portalı 27 yaşlı braziliyalı hücumçunun transfer dəyərini 45 milyon avro məbləğində qiymətləndirir.
