NATO-nun baş katibi Mark Rütte Ukrayna prezidenti Volodimir Zelenskinin Almaniya kansleri Olaf Şoltsu tənqid etməsini əsassız sayıb...
Poliqon xəbər verir ki, bu barədə Rütte DPA agentliyinə müsahibəsində bildirib.
"Mən tez-tez Zelenskiyə deyirdim ki, Olaf Şoltsu tənqid etməyi dayandırmalıdır, çünki bunu ədalətsizlik hesab edirəm", deyə Rütte bildirib.
NATO-nun baş katibi vurğulayıb ki, Almaniyanın Ukraynaya dəstəyi misilsizdir və həcminə görə ABŞ-dan sonra ikincidir, buna görə Ukrayna Şoltsa minnətdar olmalıdır:
"Olaf Şoltsun gördüyü işlər heyranedicidir. Şolts Ukraynaya hərbi dəstəyin həcminə görə Almaniyanın ABŞ-dan sonra ikinci yerdə olmasına töhfə verib - 28 milyard avro, bəzi hesablamalara görə isə hətta 34 milyard. Bu, böyük məbləğdir. Bu, bir çox digər ölkələri, o cümlədən əsas Avropa iqtisadiyyatlarını xeyli qabaqlayır".
Eyni zamanda Ukraynaya "Taurus" qanadlı raketlərinin tədarükü ilə bağlı Şoltsun ​​mövqeyindən danışan Rütte qeyd edib ki, o, şəxsən başqa qərar qəbul edərdi və onların istifadəsinə heç bir məhdudiyyət qoymazdı.
"Ümumiyyətlə, biz bilirik ki, bu cür imkanlar Ukrayna üçün çox vacibdir", deyə o, vurğulayıb ki, bununla belə, müttəfiqlərin nə təchiz etməli olması onun ixtiyarında deyil.
O əlavə edib ki, Almaniyanın Ukrayna ilə bağlı siyasətində öz dəyərlərinin və kollektiv təhlükəsizliyinin təhlükə altında olduğunu dərk etməsi vacibdir:
"Ukrayna uduzsaydı, Rusiya təhlükəsinə qarşı çıxmaq üçün müdafiəyə daha çox pul xərcləməli olardıq".
Zelenski daha əvvəl Şoltsun xüsusilə Rusiya prezidenti Vladimir Putinlə telefon danışığına görə tənqid etmişdi. O, həmçinin kanslerin "Taurus" qanadlı raketlərini tədarük etməkdən imtina etməsi ilə bağlı səhv başa düşdüyünü dəfələrlə açıq şəkildə ifadə edib.
Poliqon.info
