Artıq məlum olduğu kimi, “Real” cari 2023/2024-cü illər mövsümü İspaniya La Liqasının çempionu adını qazanıb.
Arena.az məlumat verir ki, bu zəfər 34-cü tur çərçivəsində Madrid təmsilçisinin evdə “Kadis”i 3:0 hesabı ilə məğlub etməsi mənzərəsində “Barselona”nın səfərdə “Jirona”ya məğlubiyyəti (2:4) ilə rəsmiləşib.
Beləliklə, “Real” tarixində 36-cı, “qaymaqlılar”ın baş məşqçisi, italyan mütəxəssis Karlo Ançelotti isə öz məşqçilik karyerası ərzində 6-cı dəfə ölkə çempionluğunun sevincini yaşayıb.
Bu qənimətə əlavə olaraq, Ançelotti “Milan”la İtaliya A Seriyasını (2003/2004 mövsümü), “Çelsi” ilə İngiltərə Premyer Liqasını (2009/2010 mövsümü), PSJ ilə Fransa Liqa 1- i (2012/2013 mövsümü), “Bayern”lə Almaniya Bundesliqasını (2016/2017 mövsümü) qazanıb.
“Kral klubu” ilə isə bu zəfər Ançelottinin ikinci İspaniya çempionluğudur. Buna qədər italyan mütəxəssis 2021/2022 mövsümündə “qaymaqlılar”ı çempionluğa daşımışdı.
“Real” 34 oyundan 87 xalla La Liqanın yarış cədvəlinin zirvəsində qərarlaşıb.
Karlo Ançelotti futbolçularının cari mövsümdəki işinin keyfiyyətini vurğulayıb:
“Mən heç vaxt cəmi iki məğlubiyyətlə mövsüm keçirməmişəm. Bu silsiləni davam etdirmək istəyirik. Komanda çox yaxşı, böyük fədakarlıqla çıxış edir. Hamısı böyük töhfə verdi: daha çox oynayanlar və az oynayanlar. Biz yekun mərhələyə çox ruhlanmış və qənimətlər qazanmaq arzusu ilə yaxınlaşdıq”, – AS dərgisi italyan mütəxəssisdən sitat gətirir.
Karlo Ançelotti “Real”ı 2021-ci ildən çalışdırır. İtalyan mütəxəssisin İspaniya nəhəngi ilə müqaviləsi 2026-cı ilin iyun ayının sonuna qədər qüvvədədir. “Kral Klubu”na qayıdışından sonra da “qaymaqlılar”a uğurlar qazandıra bilib. Ançelottinin rəhbərliyi altında “Real” İspaniya La Liqasını (2021/2022, 2023/2024), İspaniya Kral Kubokunu (2013/2014, 2022/2023), İspaniya Super Kubokunu (2021/2022, 20223/2024), Çempionlar Liqasını (2013/2014, 2021/2022), UEFA Super Kubokunu (2014, 2022) və FIFA Klub Dünya Kubokunu (2014, 2022) qazanıb.
64 yaşlı Ançelottinin məşqçilik məktəbindən həmçinin “Everton”, “Napoli”, “Bayern”, PSJ, “Çelsi”, “Milan”, “Yuventus”, “Parma” keçib.
