NATO-nun baş katibi Yens Stoltenberq alyans üzvlərinin Ümumi Daxili Məhsullarının 2 faizindən çoxunu müdafiəyə sərf etməli olduqlarını bəyan edib.
"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.
Tarixin ən uğurlu ittifaqının 75-ci ildönümünü qeyd etdiklərini bildirən Stoltenberq sammit çərçivəsində NATO-nun gələcəyi ilə bağlı mühüm qərarlar verəcəklərini vurğulayıb.
Stoltenberq, Ukraynaya dəstək, tərəfdaşlıqların gücləndirilməsi və NATO-nun əsas missiyası olan müdafiə və çəkindirmə ilə bağlı addımlar atacaqlarına diqqət çəkərək, "NATO-nun əsas məqsədi çəkindirici gücü ilə müharibənin qarşısını almaq və sülhü qorumaqdır",- deyə bildirib.
NATO üzvlərinin müdafiə xərclərini artırmağa razılaşdıqlarını bildirən Stoltenberq 10 il əvvəl Ümumi Daxili Məhsulun (ÜDM) yüzdə 2-nin müdafiəyə xərclənməsinə qərar verildiyini xatırladıb.
"Biz indi bilirik ki, 2 faiz minimum hədəfdir və biz daha çox xərcləməliyik. Biz daha çox iş görəcəyik", - Stoltenberq bildirib.
