2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 32 saylı Suraxanı üçüncü seçki dairəsindən deputatlığa namizədliyi irəli sürülmüş Afət Həsənovanın YAP Suraxanı rayon təşkilatının qərargahında seçicilərlə görüşü keçirilib.
YAP Suraxan rayon təşkilatının sədri Vüqar Seyidov qeyd edib ki, Yeni Azərbaycan Partiyasının bu seçkilərə “Yeni dövrə Yeni Azərbaycanla!” şüarı ilə getməsi qürurverici olmaqla tarixi qələbələrdən qaynaqlanır: “Yeni Azərbaycan Partiyası xalqın etimadını qazanan və doğruldan aparıcı partiyadır”.
Deputatlığa namizəd Afət Həsənova YAP-ın seçki platforması barədə məlumat verib. O qeyd edib ki, partiyanın seçki platformasında uğurlar və onların əsasında müəyyənləşdirilən hədəflər öz əksini tapıb: “Bu hədəflər ictimai-siyasi sabitliyin və milli təhlükəsizliyin təmin olunmasını, xalqımızın mədəni irsinin və milli-mənəvi dəyərlərinin qorunmasını, milli maraqlara əsaslanan xarici siyasəti və Azərbaycanın beynəlxalq mövqeyinin möhkəmləndirilməsini, demokratik inkişafı, müasir çağırışlara cavab verən çoxşaxəli islahatları, davamlı və dayanıqlı iqtisadi inkişafı, əhalinin rifahının yüksəldilməsini, müasir ordu quruculuğunu, gənclər siyasətini, ətraf mühitin mühafizəsi və ekoloji tarazlığın təmin olunmasını, işğaldan azad edilmiş ərazilərə tarixi qayıdışı və böyük quruculuq prosesini əhatə edir”.
Deputatlığa namizəd vurğulayıb ki, Yeni Azərbaycan Partiyası öz sıralarında 700 mindən çox insanı birləşdirir və yüksək siyasi nüfuzu ilə fərqlənir: “Əlbəttə, biz yeni dövrə Yeni Azərbaycanla gedirik. Əvvəlki parlament seçkilərindən fərqli olaraq bu dəfə seçkilər suveren respublikamızın bütün ərazilərində keçiriləcək. Şübhə yoxdur ki, yeni dönəmdə Azərbaycan yeni zirvələr fəth edəcək”.
Tədbir iştirakçılarından Arzu Hacızadə və Nuriyyə Dəmirova çıxış edərək seçiciləri parlament seçkilərində fəal iştirak etməyə və YAP-ın namizədinə səs verməyə çağırıblar.
Qeyd edək ki, həmin gün Afət Həsənova Əmircan qəsəbəsi, İlham Şükürov küçəsində də bir qrup seçici ilə görüşüb.
