Fransa yığmasının baş məşqçisi Didye Deşam “Real”ın fransalı ulduz hücumçusu Kilian Mbappe ilə görüş keçirəcək.
Arena.az bu barədə Fransanın nüfuzlu “Ekip” nəşrinə istinadən məlumat verir.
Görüşdə ulduz futbolçunun milli yığma komandadakı rolu müzakirə ediləcək. Fransız mütəxəssis ulduz futbolçu ilə “xoruzlar”ın kapitan sarğısı mövzusunu da müzakirə edəcək. Deşam şəxsi söhbətində Mbappenin komandanın kapitanı olaraq qalmaq istəyib-istəmədiyini öyrənmək niyyətindədir.
Xatırladaq ki, Deşam Mbappeni Fransa yığmasının oktyabr və noyabr toplanışlarına cəlb etməyib. Ulduz futbolçu ilə fransız mütəxəssis arasında fikir ayrılıqlarının olduğu haqda şayiələrə rəğmən, Deşam qərarını Mbappenin bərbad idman formasında olması ilə əsaslandırıb. Fransız mütəxəssis daha sonra bir daha vurğulayıb ki, bu qərarının pərdəarxası heç bir təfərrüatı yoxdur. Deşam Mbappenin idman formasını bərpa etməsini, fiziki və psixoloji yükdən qurtulmasını istəyir.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 16 oyuna 8 qol vurub, 2 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
“Transfermarkt” internet-portalı 25 yaşlı fransalı hücumçunun transfer dəyərini 180 milyon avro məbləğində qiymətləndirir.
