Avropa İttifaqı ölkələrinin daimi nümayəndələri çərşənbə günü, 11 dekabrda Brüsseldə Rusiya Federasiyasına qarşı 15-ci sanksiyalar paketini təsdiqləyiblər.
Qaynarinfo xəbər verir ki, bu barədə DW məlumat yayıb.
Avropa Komissiyasının rəhbəri Ursula fon der Lyayenin sözlərinə görə, məhdudiyyətlər "kölgə donanması" adlanan bir qrup tankerə qarşı mübarizəyə yönəlib. Ruslar bu tankerlərdən istifadə edərək G7 və onların tərəfdaşlarının tətbiq etdiyi məhdudiyyətlərdən yan keçərək neft və neft məhsullarını ixrac edirlər. Sanksiya siyahısına Qərbin məhdudiyyətlərindən yan keçməyə kömək edən yeni şəxslər və şirkətlər əlavə ediləcək.
Bu sanksiyalar Avropa İttifaqı Şurasında xarici işlər nazirləri tərəfindən 16 dekabr bazar ertəsi günü yekun olaraq təsdiqlənməlidir. Bildirilir ki, Avropa artıq Rusiyaya qarşı 16-cı paketi hazırlayır və onu Rusiya Federasiyasının Ukraynaya tammiqyaslı işğalının üçüncü ildönümü ilə əlaqələndirə bilərlər. Gözlənilir ki, bu paket daha "genişmiqyaslı" olacaq.
Xatırladaq ki, UNİAN-ın məlumatına görə, ötən həftə Avropa İttifaqının səfirləri Rusiyaya qarşı 15-ci sanksiyalar paketini təsdiqləyə bilməmişdi. Reuters-in məlumatına əsasən, Avropa İttifaqının iki üzvü, Avropa şirkətlərinə Rusiyadakı sərmayələrini çıxarmaq üçün verilən müddətin uzadılması məsələsində yaranan fikir ayrılıqları səbəbindən paketi bloklamışdı.
Daha sonra Politico bildirib ki, Latviya və Litvanın mövqeyi səbəbindən Avropa İttifaqı yeni sanksiyalar paketi ilə bağlı razılığa gələ bilməmişdi. Bu ölkələr Qərb şirkətlərinə sanksiyalara baxmayaraq, Rusiyada işləməyə davam etməyə imkan verən müddəanın uzadılmasını nəzərdə tutan paketi dəstəkləməkdən imtina ediblər.
UNİAN həmçinin məlumat verib ki, Avropa İttifaqı ABŞ-a təzyiq göstərərək, Rusiya "Qazprombank"ına qarşı sanksiyaların yumşaldılmasını tələb edir. Bloomberg xatırladır ki, bu maliyyə qurumu Rusiya qazının Avropa İttifaqına çatdırılmasının təmin olunması üçün açar rolunu oynayır.
Alpər
