"Başqalarının yaxşı gününə qıcıqlanmaq tez-tez insanların öz həyatlarından narazılıq, özünəinam çatışmazlığı, və ya qısqanclıq kimi duyğulardan qaynaqlanır. Bu, mütləq bir xəstəlik deyil, ancaq psixoloji problemlərin əlaməti ola bilər". Bu sözləri SİA-ya açıqlamasında psixoloq Zeynəb Eyyubova deyib.
Psixoloq sözlərinə belə davam edib: "Bu cür hissləri yaşayan insanlar özlərinin müvəffəqiyyətlərini və ya həyatlarında nəyin çatışmadığını düşünürlər və başqalarının uğurlarına qarşı həssaslıq göstərə bilərlər. Bu duyğuların əsas səbəbini araşdırmaq və qəbul etmək, onların öhdəsindən gəlməyə kömək edə bilər.
Psixoloq olaraq verə biləcəyim məsləhətlər:
- İlk növbədə, bu hisslərin haradan qaynaqlandığını anlamaq vacibdir. Özünüzə "Niyə belə hiss edirəm?" - sualını verin və cavabları düşünün.
- Başqasının uğuruna sevindiyiniz zaman öz həyatınızdakı müsbət cəhətləri də görməyə çalışın. Empati göstərmək, bu hissləri yüngülləşdirə bilər.
- Başqaları ilə özünüzü müqayisə etmək əvəzinə, öz nailiyyətlərinizi və müsbət cəhətlərinizi qeyd edin.
- Öz həyatınızda nəyi dəyişmək istədiyinizi müəyyənləşdirin və bu istiqamətdə çalışın. Bu, başqalarının uğurunu təhdid kimi görməyin qarşısını ala bilər.
Bu hisslər uzun müddət davam edirsə və ya həyat keyfiyyətinizə təsir edirsə, peşəkar bir psixoloqdan kömək almaq faydalı ola bilər. Bu, daxili gərginliyi azaltmağa və daha pozitiv düşünməyə kömək edə bilər.
Bu məsləhətlər insanın öz psixoloji rifahını yaxşılaşdırmaq üçün addımlar atmasına kömək edə bilər".
Ayşən Vəli
