“Əl-Nəsr”in portuqal ulduz hücumçusu Kristiano Ronaldo “Real”ın braziliyalı ulduz hücumçusu Viisius Junior haqda söhbət açıb.
Arena.az məlumat verir ki, o, 2024-cü il “Globe Soccer Awards” mərasiminin səhnəsində çıxış edərək, Vinisiusun 2024-cü il “Qızıl top” mükafatına layiq olduğunu bildirib:
“Vinisius fantastik iş görür. Fikrimcə, o, “Qızıl top”u qazanmağa layiq idi. Bu, (Vinisiusun səsvermədə ikinci olmasını nəzərdə tutur – redaktorun qeydi) mənim fikrimcə, ədalətsizlik idi. Mükafat Rodriyə verildi, o da buna layiqdir. Amma məncə, Vinisiusa final oyununda vurduğu qolla Çempionlar Liqasını qazandığı üçün bu, təqdim edilməli idi. Buna görə də “Globe Soccer Awards”ı bəyənirəm, burada hər şey ədalətlidir”, deyə Ronaldo vurğulayıb.
“Kristiano, Neymar kimi, mənim kumirimdir”
Öz növbəsində Vinisius Ronaldonun bu sözlərinə qarşılıq verib: “Əgər o, mənim ən yaxşı oyunçu olduğumu deyirsə, o zaman ən yaxşı olduğuma inanıram. Kristiano, Neymar kimi, mənim kumirimdir”.
Xatırladaq ki, 2024-cü il “Globe Soccer Awards” təqdimatında Vinisius ilin ən yaxşı oyunçusu seçilib.
2024-cü il “Qızıl top” mükafatı isə “Mançester Siti”nin ispan yarımmüdafiəçisi Rodriyə verilib. Vinisius mükafatı qazanmağa əsas namisəd olsa da, səsvermədə ikinci yeri tutub.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib.
Vinisiusun İspaniya nəhəngi ilə müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 20 oyuna çıxıb, 13 qol və 9 məhsuldar ötürmə ilə fərqlənib.
Vinisiusun “Real”da çıxışının ümumi mənzərəsi isə belədir: 285 oyun, 97 qol, 83 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023), FIFA Qitələrarası Kubokun (2024) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 37 oyun keçirib, 5 qol vurub və 5 məhsuldar ötürmə verib. Vinisius Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
