Almaniyanın Rusiyadakı səfiri Aleksandr Lambsdorfun məsləhətləşmələr üçün geri çağırılması və Rusiyanın kiberhücumlarda ittiham edilməsi Moskvaya qarşı nifrətin qızışdırılması məqsədi daşıyır.
Musavat.com RİA Novosti-yə istinadla xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
“Bu, əsassız fərziyyə idi, onlar atmosferi qızışdırırlar”, - diplomat bildirib.
O, haker hücumları mövzusunun ABŞ daxilindən qaynaqlandığını istisna etməyib. Zaxarovanın sözlərinə görə, NATO-ya üzv ölkələrin və Avropa İttifaqının (Aİ) bu məsələ ilə bağlı çoxsaylı bəyanatları “anti-Rusiya kartının açılması” səbəbindən Amerika tərəfi üçün faydalı ola bilər.
Eyni zamanda diplomat qeyd edib ki, Rusiya Federasiyasına qarşı ittihamları yoxlamaq üçün heç bir yol yoxdur. Almaniya, Çexiya və ABŞ-ın digər müttəfiqləri öz sözlərini təsdiqləyən heç bir sübut təqdim etmirlər.
Mayın 3-də “Röyter” agentliyi Almaniya Daxili İşlər Nazirliyindəki mənbəyə istinadən ölkənin “Rusiya Federasiyasının kiberhücumuna” məruz qaldığını bildirib. Xüsusilə alman şirkətləri və elektron xidmətlər hakerlərin hədəfinə çevrilib.
Mayın 6-da Berlin Moskvadakı səfiri Aleksander Lambsdorffu məsləhətləşmələr üçün geri çağırıb. Buna səbəb 2023-cü ildə Almaniya Sosial Demokrat Partiyasının (SPD) resurslarına kiberhücum etməkdə Rusiya Federasiyasına qarşı ittihamlar olub.
Musavat.com
