Fransa prezidenti Emmanuel Makron və İsrailin baş naziri Benyamin Netanyahu İsrail və Livan arasında "Mavi xətt" adlanan sərhəd xəttindəki gərginliyi müzakirə ediblər. Bizimyol.info xəbər verir ki, Fransanın Təl-Əviv səfirliyinin "X" hesabında verilən açıqlamaya görə, Makron və Netanyahu telefonda bölgədəki vəziyyəti müzakirə ediblər. Makron İsrail və Hizbullah arasında "Mavi xətt"də gərginliyin artması ilə bağlı ciddi narahatlığını ifadə edib. Bölgədə Livan və İsrailin maraqlarına zidd işləyəcək gərginliyin artmasının qarşısının alınması lazım olduğuna diqqət çəkən Makron, belə bir vəziyyətin regional sabitlik üçün son dərəcə təhlükəli bir hadisə olacağını qeyd edib. Makron bütün tərəflərin diplomatik həllə doğru sürətlə hərəkət etməli olduğunu və maksimum təmkinliliyin vacibliyini vurğulayıb. Fransanın diplomatik həll üzərində işləməyə hazır olduğunu deyən Makron, İsrailin Rəfah və Xan Yunisdə yeni “əməliyyatına” qarşı olduğunu bildirib. Makron, humanitar yardımların insanların ehtiyaclarına uyğun olaraq bölgəyə çatması üçün Qəzzada dərhal və daimi atəşkəsin yaradılması və keçid məntəqələrindəki bütün maneələrin aradan qaldırılması lazım olduğunu bildirib. Bölgədəki “böhran”dan çıxmaq üçün iki dövlətli həllə gətirib çıxaracaq siyasi çərçivənin olması lazım olduğunu qeyd edən Makron, Fələstin hökumətinə pul köçürmələri qarşısında duran bütün maneələrin aradan qaldırılmasını tələb edib. Makron işğal altındakı İordan çayının qərb sahilində 5 qeyri-qanuni məskunlaşmanın leqallaşdırılması ilə bağlı açıqlamaları iki dövlətli həll və sülh səylərinə xələl gətirdiyi səbəbiylə pisləyib. İki siyasətçi görüş zamanı İranın nüvə proqramını da müzakirə ediblər. Oktyabrın 7-dən Qəzza zolağına hücumlarını davam etdirən İsrail şimal sərhədində də Livan Hizbullahı ilə döyüşür. Son həftələr İsrail və Livan arasında "Mavi xətt" adlanan sərhəd xəttində gərginlik artmaqdadır. İsrail ordusu iyunun 18-də Livana mümkün hücum üçün "əməliyyat planını" təsdiqlədiyini açıqlayıb. İsrailin xarici işlər naziri Yisrael Katz iyunun 21-də verdiyi açıqlamada Hizbullahın İsrail torpaqlarına və vətəndaşlarına hücumlarına icazə verilə bilməyəcəyini və tezliklə lazımi qərarları verəcəklərini bildirib. İsrail ordusunun oktyabrın 8-dən Livana həyata keçirdiyi hücumlarda indiyədək 356 Hizbullah üzvü ölüb. Qadir, Bizimyol.info
phrase_var_article.topics