“Zirə”nin mərkəz müdafiəçisi, braziliyalı futbolçu Ruan Renato Azərbaycan çempionatlarında 100-cü oyununu keçirib.
Arena.az xəbər verir ki, 30 yaşlı oyunçunun yubileyi Azərbaycan Premyer Liqasının 9-cu turuna təsadüf edib.
Ruan “Turan Tovuz”la səfər matçına start heyətində çıxıb. O, Premyer Liqada çıxdığı 100 oyunda 5 qol vurub, 1 məhsuldar ötürmə müəllifi olub.
Renato Azərbaycanda iki komandada forma geyinib. “Qəbələ”də 59 görüşdə 4 dəfə qola sevinən müdafiəçi “Zirə”də keçirdiyi 41 qarşılaşmada 1 dəfə fərqlənib.
Onun debütü 2021/2022 mövsümünə təsadüf edib. Ruan 2021-ci il avqustun 15-də “Neftçi” – “Qəbələ” oyununda (2:2) şans qazanıb.
Xatırladaq ki, “Turan Tovuz” – “Zirə” görüşündə qərblilər 1:0 hesabı ilə qələbə qazanıblar.
Ruan Renato 2023-cü ilin iyulundan “Zirə”də çıxış edir. O, 2021-ci ilin avqustundan “Zirə”yə keçənə qədər də “Qəbələ”də forma geyinib. Braziliyalı oyunçu karyerası ərzində “Ponte Preta”, “Yuventude”, “Fiqeyrense”, “Vitoriya”, “Austriya” (Vyana) və “Botafoqo” kimi klublarda da çıxış edib.