OPEC+ üzvləri 2025-ci ilin ilk ayları üçün hasilat siyasətini müəyyən etmək üçün bazar günü keçiriləcək iclasdan əvvəl yanvarda başlaması planlaşdırılan neft hasilatının artırılmasını yenidən təxirə salmağı düşünürlər.
Marja xəbər verir ki, Qrup 2024 və 2025-ci illərdə istehsalın azaldılmasını tədricən aradan qaldırmağı planlaşdırırdı. Lakin qlobal neft tələbinin azalması və qrupa daxil olmayan ölkələrin hasilatlarını artması bu planı kölgədə qoyub.
İraq, Səudiyyə Ərəbistanı və Rusiya Bağdadda görüşüb
OPEC+ mənbələrinin məlumatına görə, qrupun əsas üzvləri İraq, Səudiyyə Ərəbistanı və Rusiya çərşənbə axşamı Bağdadda görüşərək hasilat siyasətini müzakirə ediblər. Danışıqlardan sonra yanvarda başlaması planlaşdırılan hasilat artımının daha bir neçə ay təxirə salınmasının gündəmdə olduğu bildirilib.
OPEC+-ın hasilatın artırılmasını ləngitməsi ehtimalı Asiya ticarətinin əvvəlində neft qiymətlərini yüksəltib. ANZ analitikləri bu xəbərin bazarlarda qiymətlərə müsbət təsir etdiyini bildiriblər.
Qərbi Texas xam neft müqavilələri 0,03 faiz artaraq 68,80 dollar/barelə yüksəlib, Brent markalı neft müqavilələri 0,08 faiz artaraq 72,89 dollar/barel olub.
Yaxın Şərqdəki hadisələr qiymətlərə təsir edir
Analitiklərin fikrincə, İsrail və Livan arasında əldə olunan atəşkəs razılaşması neft qiymətlərinə aşağı istiqamətli təzyiq göstərir. Bununla belə, OPEC+-ın hasilat qərarları ilə bağlı gözləntilər bu təsiri tarazlaşdırıb.
OPEC+ ölkələrinin yekun qərarı bazar günü keçiriləcək iclasda açıqlayacaqları gözlənilir. Bu qərar 2025-ci il üçün neft tələb və təklifi balansında həlledici olacaq.
