Portuqaliya yığmasının hücumçusu Kristiano Ronaldo Səudiyyə Ərəbistanının “Əl-Nəsr” klubunun heyətində növbəti matçına çıxıb.
Arena.az xəbər verir ki, o, Səudiyyə Ərəbistanı çempionatının 7-ci turu çərçivəsində baş tutan “Əl-Şabab”la oyunun iştirakçısı olub.
“Əl-Nəsr” səfərdə baş tutan bu oyunda 2:1 hesablı qələbəyə sevinib. Start heyətdə meydana çıxan Kristiano sonadək oynayıb. O, komandasının qələbəsində 1 qolla pay sahibi olub. Ronaldo 90+7-ci dəqiqədə penaltidən vurduğu qolla komandasına qələbə qazandırıb.
7 turdan sonra 17 xal toplamış “Əl-Nəsr” çempionatın yarış cədvəlinin 2-ci pilləsində qərarlaşıb. “Əl-Şabab” isə 12 xalla 4-cü pillədə yer alıb.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib. Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 10 oyuna 9 qol və 3 məhsuldar ötürmə ilə fərqlənib. Kristianonun “Əl-Nəsr” karyerası ümumilikdə 74 oyun, 67 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib.
Kristiano Portuqaliya yığmasının heyətində 216 oyuna 133 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı hücumçunun transfer dəyərini 15 milyon avro məbləğində qiymətləndirir.
