“Mançester Siti”nin ispan yarımmüdafiəçisi Rodri “şəhərlilər”in norveçli hücumçusu Erlinq Haland haqda söhbət açıb.
Arena.az ispan futbolçunun bu barədə fikrini təqdim edir:
“Erlinq qol vəziyyətlərini gerçəkləşdirmək baxımından dünyanın ən qətiyyətli oyunçusudur. Üstəlik, o, hələ çox gəncdir. İnanıram ki, o, Lionel Messi və Kristiano Ronaldoya yaxınlaşa biləcək yeganə oyunçudur”, deyə Rodri vurğulayıb.
Xatırladaq ki, Haland cari mövsümdə vurduğu 12 qolla İngiltərə Premyer Liqasının ən sərrast qolçusudur.
Erlinq “Mançester Siti”yə 2022-ci ilin iyulunda 60 milyon avro məbləğ müqabilində Dortmund “Borussiya”sından keçib. Norveçli hücumçunun İngiltərə klubu ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə Haland “şəhərlilər”in heyətində bütün yarışlarda 16 oyuna çıxıb, 15 qol vurub. Erlinqin “Mançester Siti”nin heyətində çıxışının ümumi mənzərəsi isə belədir: 114 oyun, 105 qol, 14 məhsuldar ötürmə.
Haland “Mançester Siti”də ilk mövsümündəcə İngiltərə Premyer Liqasının, İngiltərə Kubokunun, UEFA Çempionlar Liqasının, UEFA Super Kubokunun və FIFA Klub Dünya Kubokunun qalibi olmuşdu. Geridə qalmış mövsümdə isə “qolçu vikinq” ardıcıl ikinci dəfə İngiltərə çempionluğunu qazanıb. Haland yeni mövsümə də İngiltərə Super Kubokunu qazanmaqla başlayıb.
Erlinq Haland 2019-cu ilin sentyabr ayında debüt etdiyi Norveç yığmasının heyətində 37 oyuna 34 qol, 3 məhsuldar ötürmə ilə fərqlənib.
“Transfermarkt” internet-portalı 24 yaşlı norveçli hücumçunun transfer dəyərini 200 milyon avro məbləğində qiymətləndirir. Bu, Halandın dünyanın ən bahalı futbolçusu olduğu deməkdir.
