“İnter Mayami”nin argentinalı kapitanı, ulduz hücumçu Lionel Messi yeni nəslin ən yaxşı futbolçusunun kimliyi ilə bağlı sualı cavablayıb.
Arena.az “Football España” dərgisinə istinadən, argentinalı ulduzun bu barədə cavabını təqdim edir:
“Öz gəncliyimi gördüyüm yeni nəsil oyunçusu? Mən indiki gənc futbolçuları bəyənirəm, onları qarşıda çox şey gözləyir. Əlbəttə, Lamin Yamal haqqında eşitmişəm. O, ardıcıllığını qorumalıdır, amma bu, həm özündən və həm də digər amillərdən asılıdır. O, artıq əla səmərə nümayiş etdirir və əminəm ki, onu parlaq gələcək gözləyir”, deyə Lionel Messi vurğulayıb.
Xatırladaq ki, Messi kimi, Lamin Yamal da “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Yamal “blauqrana”nın heyətində bütün yarışlarda 20 oyuna çıxıb, 6 qol və 12 məhsuldar ötürmə ilə fərqlənib.
Lamin Yamalın “Barselona”da çıxışının ümumi mənzərəsi 71 oyun, 13 qol və 21 məhsuldar ötürmədən ibarətdir.
Yamal 2023-cü ilin sentyabrında debüt etdiyi İspaniya yığma komandasının heyətində 17 oyun keçirib, 3 qol vurub, 9 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı cinah hücumçusunun transfer dəyərini 150 milyon avro məbləğində qiymətləndirir.
