Rusiya prezidentinin mətbuat katibi Dmitri Peskov Çeçenistan fövqəladə hallar naziri Sakayevin Dağıstanda saxlanılması ilə bağlı sualına cavab olaraq bildirib ki, Kremlin bu vəziyyətlə bağlı məlumatı yoxdur.
Musavat.com Rusiya mediasına istinadla xəbər verir ki, D.Peskov jurnalistlərlə brifinq zamanı deyib: “Xeyr, bu bizə aid sual deyil, sadəcə adıçəkilən şöbəyə zəng edib orada məlumat almaq lazımdır”.
Aprelin 17-də “Baza” Telegram kanalı xəbər verib ki, bir gün əvvəl hüquq-mühafizə orqanlarının əməkdaşları Dağıstandakı nəzarət-buraxılış məntəqəsində Çeçenistanın Fövqəladə Hallar Nazirliyinin rəhbəri Əlixan Sakayevin idarə etdiyi güman edilən avtomobili saxlamağa cəhd ediblər.
“Aprelin 14-də bir neçə polis əməkdaşı Sakayevi Novolakski rayonundakı Gerzel nəzarət-buraxılış məntəqəsində qara rəngli avtomobildən çıxarıb üzüstə asfalta yıxıblar. Mənbənin sözlərinə görə, Sakayevin yanında sənədləri olmayıb”, - nəşr yazır.
Telegram kanalının verdiyi məlumata görə, sürücü qarşıdan gələn zolağa çıxıb və yol polisi əməkdaşlarının tələblərinə məhəl qoymayıb, daha sonra az qala onları vurub. Sürücünün sərxoş olduğu bildirilib.
“Baza”nın məlumatına görə, həbs olunandan az sonra həmin şəxs tibbi arayış olmadan buraxılıb. Medianın yazdığına görə, onu xilas etmək üçün Çeçenistana aid dövlət nömrə nişanlı bir neçə avtomobil və yüksək rütbəli təhlükəsizlik işçiləri gəlib.
Hər iki respublikanın rəsmi nümayəndələri bu hadisəni şərh etməyiblər. Federal strukturlardan da heç bir reaksiya olmayıb.
Musavat.com
